Víes ye una novela non novela o, si quieren ustedes, una novela de tesis, de delles tesis: ecoloxismu, feminismu, solidaridá, antirracismu... Una obra coral na qu'un garapiellu personaxes distintos al rodiu de Nela, la moza guapa, alta y roxa que sabe ver les necesidaes propies y ayenes y sabe lluchar por elles, válen-y a la voz narradora d'escusa pa esponer les tesis de quien escribe. D'ehí que Víes sía una non novela y sí una suma d'esposiciones de y lluches por causes perdíes. Empatía, comprensión, trabayu, música, solidaridá, sinerxia, resiliencia, harmonía, esperanza, sumar más que restar, respetu, dinidá, superar les penes, gabita a persones que la precisen, respetu a los animales, a la natura, amor, muncha lliteratura, collaborar en causes dolioses, arte y bien de paciencia pa caleyar esti mundiu que va a pior día tres día. Como dixo mio ma: Les mios obligaciones yá les cumplo, los mios derechos reclámolos . Y tamién dixo Mijaíl Bakunin: A cada persona según la so necesidá, de cada persona según la so capacidá .